10 տարեկան Տիգրանն է, արդեն հստակ որոշում ունի՝ կյանքը կապել երաժշտության հետ 

Ծանոթացեք՝ Ուռուցքաբանության ազգային կենտրոնի հերոսներից Տիգրանն է: Արդեն 6 տարուց ավել է` պայքարում է ոտքի խնդրի դեմ: 6 տարի առաջ տղան սկսել է գանգատվել ցավերից և աջ ստորին վերջույթի դեֆորմացիայից, այլ բժշկական կենտրոնում գտնվել դինամիկ հսկողության տակ: Ուռուցքային պրոցեսի հետևանքով առաջացել է դեֆորմացիա, որը ժամանակի ընթացքում դարձել է ավելի արտահայտիչ: 

Տիգրանը Ուռուցքաբանության ազգային կենտրոն է դիմել 2023թ.-ի հունվարին:

Հետազոտություններից հետո ախտորոշվել է աջ մեծ ոլոքի միջին երրորդականի ֆիբրոզ դիսպլազիա, վալգուսային դեֆորմացիա, վերջույթի կարճացում: Անհրաժեշտ է եղել վիրահատություն:

Կատարվել է վիրահատություն՝ ներօջախային մասնահատում ալլոպլաստիկայով և արտաքին ֆիքսացիայի ապարատի տեղադրումով: Վիրահատությունն անցել է հարթ, առանց բարդությունների: 

Չնայած առժամանակ ֆիզիկական ակտիվության սահմանափակման՝ Տիգրանը ժպտում է, պատմում դպրոցական կյանքի, ռուսերենին ընտիր (շեշտում է Տիգրանը) տիրապետելու, դաշնամուր նվագելու և հետագայում կյանքը դրա հետ կապելու մասին: Ցույց է տալիս կենտրոնից դուրս գրվելու օրը, երբ բժիշկների նկարներով տորթ է բերել, նրանց հետ լուսանկարվել: Ու դե հպարտ ասում է՝ ՈՒԱԿ այսօր եկել է ինքնուրույն՝ քայլելով, կամաց, բայց քայլելով:

Լուսանկարներն ու պատմությունը հրապարակվել են ծնողների համաձայնությամբ։