Երևանում տեղի է ունեցել Ռադիոլոգիայի հայկական 6-րդ համագումարը, որին մասնակցել է նաև Ուռուցքաբանության ազգային կենտրոնի Ախտորոշիչ ծառայության բժիշկ-ռադիոլոգ Սոնա Ջիլավյանը։

Համագումարին մասնակցել են ինչպես հայաստանյան առաջատար մասնագետներ, այնպես էլ ռադիոլոգներ Եվրոպայից և Ռուսաստանից։ Ներկայացրել են զեկույցներ՝ կիսվելով ոլորտի նորություններով և սեփական փորձով:

ՈՒԱԿ մասնագետը նույնպես հանդես է եկել զեկույցով և ներկայացրել ՈՒԱԿ դիմած 52-ամյա կնոջ մոտ շատ հազվադեպ հանդիպող (1 %) կրծքագեղձի բարորակ գոյացության դեպքը։





Դեպքի առանձնահատկությունը կայանում էր նրանում, որ կլինիկական և ռադիոլոգիական պատկերների միջև եղել է տարբերություն։ Ուռուցքը կլինիկորեն ունեցել է չարորակի բոլոր դրսևորումները, սակայն ռադիոլոգիապես այն որակվել է բարորակ։ Հետագայում հյուսվածաբանորեն հաստատվել է գոյացության բարորակ լինելը։

Սոնա Ջիլավյանը խոսել է արդի խնդրի՝ հետազոտության ընթացքում առաջացող ախտորոշման և տարբերակման դժվարությունների մասին։ Կոլեգաների հետ ևս մեկ անգամ փաստել՝ ռադիոլոգների և կլինիցիստների համագործակցության կարևորության մասին, ինչը հիվանդությունների ճիշտ ախտորոշման և բուժման ընթացակարգ կազմելու կարևոր գործոններից է։

ՈՒԱԿ մասնագետները կարևորում են մասնագիտական զարգացումն ու ժամանակակից մոտեցումների տեղայնացումը։