32 տարեկան տղամարդը Ուռուցքաբանության ազգային կենտրոն է դիմել ծանր վիճակում՝ գանգատվելով պարբերական բնույթ կրող գլխապտույտներից, գլխացավերից և հավասարակշռության խանգարումներից:

Հետազոտություններից հետո տղամարդու մոտ ախտորոշվել է 4-րդ փորոքի ուռուցք:

Գոյացությունը գտնվում էր կենսական շատ կարևոր կենտրոնների կողքը՝ ուղեղի ցողունի մոտ, որի վնասվելու դեպքում կարող էր լինել շնչառական կանգ, սրտի աշխատանքի կանգ:

ՈՒԱԿ-ի մասնագետները որոշել են գնալ վիրահատություն և կատարել նյարդավիրաբուժության ամենածանր վիրահատություններից մեկը:

Վիրահատությունը կատարել են Ուռուցքաբանության ազգային կենտրոնի Նեյրոօնկոլոգիական բաժանմունքի ղեկավար Լևոն Հարությունյանը, բաժանմունքի բժիշկ-նեյրովիրաբույժ Աննա Կիզոկյանը, անեսթեզիոլոգ՝ Արշակ Հարությունյան:

Բարդագույն վիրահատությունը անցել է բարեհաջող:

32 տարեկան բուժառուն դուրս է գրվել ՈՒԱԿ-ից գանգատների և նյարդաբանական շեղումների լրիվ հետզարգացումով: