Ինչպես հայտնի է, հոկտեմբեր ամիսը միջազգայնորեն համարվում է կրծքագեղձի քաղցկեղի դեմ պայքարի և այդ խնդրի մասին տեղեկացված լինելու ամիս: Այդ կապակցությամբ ԱՆ Ուռուցքաբանության ազգային կենտրոնը հոկտեմբեր ամսվա ընթացքում նախատեսել է մի շարք միջոցառումներ, որոնց թվում էր «Կրծքագեղձի քաղցկեղի աշնանային գիտաժողովը»:

Ուռուցքաբանության ազգային կենտրոնը գիտաժողովը կազմակերպել էր The American Austrian Foundation-ի հետ միասին OMI Visiting Professorship շրջանակներում: Գիտաժողովի գլխավոր հյուրն էր կրծքագեղձի օնկոպլաստիկ վիրաբույժ MD Mahmoud El Tamer-ը` Նյու Յորքի Evelyn H. Lauder Breast Cancer Center Memorial Sloan-Kettering Cancer Center կենտրոնից:

Նա ներկայացրեց ԱՄՆ-ի մեր գործընկերների փորձը կրծքագեղձի քաղցկեղի օնկոպլաստիկայի վերաբերյալ, տեղային տարածված կրծքագեղձի քաղցկեղի խնդիրները, բուժման տակտիկան նեոադյուվանտ քիմիաթերապիայից հետո: Գիտաժողովին մասնակից բժիշկները քննարկման էին ներկայացրել կլինիկական առանձին հետաքրքիր դեպքեր: Գիտաժողովին մասնակցել էին ուռուցքաբաններ, վիրաբույժներ, պլաստիկ վիրաբույժներ, գինեկոլոգներ և այլ մասնագետներ: Ստացված նոր տեղեկատվությունը, բազմաթիվ քննարկումները և կառուցողական մտքերի փոխանակումն իրենց կարևոր դերը կունենան Հայաստանում ուռուցքաբանության տվյալ ոլորտի նոր որակի ձևավորման գործում: