Վ․ Ա․ Ֆանարջյանի անվան ուռուցքաբանության ազգային կենտրոնի Ընդհանուր և էնդովիրաբուժության բաժանմունքում հաջողությամբ իրականացվել է բարդ ու ծավալուն վիրահատություն․ պացիենտի մոտ հեռացվել է ենթաստամոքսային գեղձի նեյրոէնդոկրին ուռուցքը։

67 տարեկան պացիենտը կենտրոն էր դիմել որովայնի ձախ կեսում երկարատև բութ և երբեմն գոտևորող ցավերի գանգատով։ Հետագա հետազոտություններով հայտնաբերվել էր խոշոր՝ 12×11×15 սմ չափի գոյացություն, որը ախտահարել էր ենթաստամոքսային գեղձի պոչը և մարմինը։ Առկա էին նաև ուղեկցող լուրջ խնդիրներ՝ լյարդի ցիռոտիկ փոփոխություններ և պորտալ հիպերտենզիա։

Մանրակրկիտ աշխատանքի արդյունքում բժիշկներին հաջողվել է ուռուցքը հեռացնել ամբողջությամբ․ պահպանվել է միայն ենթաստամոքսային գեղձի գլխիկի փոքր հատվածը։

Նշենք, որ նեյրոէնդոկրին ուռուցքները համարվում են հազվադեպ՝ կազմում են ենթաստամոքսային գեղձի նորագոյացությունների ընդամենը 5-10%-ը։ Դրանք հաճախ չեն ախտորոշվում վաղ փուլերում և սովորաբար հայտնաբերվում են արդեն մեծ չափերի դեպքում։

Վիրահատությունը կատարել են ՈՒԱԿ Ընդհանուր և էնդովիրաբուժության բաժանմունքի վարիչ Հմայակ Եփրեմյանը, բժիշկ-ուռուցքաբան Վիկտորյա Հովհաննիսյանը և անեսթեզիոլոգ Ստեփան Ֆարսյանը։ Նրանց համատեղ աշխատանքի շնորհիվ հնարավոր է եղել արդյունավետորեն հաղթահարել բարդագույն վիրաբուժական մարտահրավերը։

Այս հաջողված միջամտությունը ևս մեկ անգամ վկայում է, որ Ուռուցքաբանության ազգային կենտրոնի մասնագիտական ներուժը հնարավորություն է տալիս իրականացնել ամենաբարդ վիրահատությունները և ապահովել բուժառուների կյանքի որակի զգալի բարելավում։