Հայաստանում վիրաբուժության պատմության մեջ առաջին անգամ կայանում է համատեղ կոնգրես, որն ընդգրկում է Վիրաբուժության եվրոպական միության  22-րդ տարեկան համաժողովը, Վիրաբույժների հայկական ասոցիացիայի 4-րդ հնգամյա կոնգրեսը, Ռեզիդենտների և երիտասարդ գիտնականների եվրոպական 3-րդ համաժողովը: Վ.Ա. Ֆանարջյանի անվան ուռուցքաբանության ազգային կենտրոնը ներկայանում էր համատեղ կոնգրեսի պլատինե գործընկեր:

Միջոցառման մեկնարկը տրվել է սեպտեմբերի 26-ին, Գաբրիել Սունդուկյանի անվան ազգային ակադեմիական թատրոնի դահլիճում: Այն կշարունակվի մինչև սեպտեմբերի 28-ը:

Վ.Ա. Ֆանարջյանի անվան ուռուցքաբանության ազգային կենտրոնն ակտիվորեն մասնակցում է կոնգրեսի աշխատանքներին և Կենտրոնի առաջատար վիրաբույժները հանդես կգան հետաքրքիր զեկույցներով: Այս մասին մեզ հետ զրույցում ասաց Կրծքավանդակի և որովայնային ուռուցքաբանության բաժանմունքի վարիչ Գագիկ Համբարձումյանը:

Նրա խոսքով՝ միջոցառումն, ինքնին, մեծ հնարավորություններ է տալիս մասնագետին՝ անմիջապես անվանի մասնագետների հետ շփվելով, գնահատել ժամանակակից վիրաբուժությունը, ձեռք բերել փորձի փոխանակում:

«Վ.Ա. Ֆանարջյանի անվան ուռուցքաբանության ազգային կենտրոնը կոնգրեսին հանդես է գալիս Հայաստանում վերականգնողական վիրաբուժական հնարավորությունների մասին զեկույցներով, ներկայացնում թեմաներ, որոնք վերաբերում են կրծքագեղձի ուռուցքներին, աղեստամոքսային համակարգի ու նրա լիմֆատիկ համակարգի հեռացմանը, և հատկապես կերակրափողի ուռուցքների ժամանակ կիրառվող մեթոդներին: Սրանք թեմաներ են, որոնք  շատ արդիական են ամբողջ աշխարհում, և մենք անմասն չենք մնում, ասելիք շատ ունենք, ուստի թեմաների ընտրությունը պատահական չի եղել: Օրեցօր ուռուցքաբանությունը զարգանում է, ինչի արդյունքում հրատապ թեմաները դինամիկ փոփոխվում են, ինչ ստիպում է պարբերաբար վերանայել առաջնահերթությունները վիրաբուժությունում և հստակեցնել նրա դերը ուռուցքաբանության մեջ: