Օնկոգինեկոլոգիական հիվանդությունների բուժման ընթացքը բրախիթերապիայով
ՈՒԱԿ Ներխոռոչային և ներհյուսվածքային ճառագայթային թերապիայի բաժանմունքի մասնագետները բրախիթերապիայի միջոցով դադարեցրել են քաղցկեղով պացիենտի տեղային արյունահոսությունը:
Արգանդի մարմնի քաղցկեղի IV փուլում գտնվող 42-ամյա կինը սկսել է բուժումը ՈՒԱԿ պալիատիվ ծառայության կլինիկայում՝ գանգատվելով սեռական ուղիներից առատ արյունային արտադրությունից: Անհրաժեշտ հետազոտություններից հետո տեղափոխվել է ներխոռոչային և ներհյուսվածքայի ճառագայթային թերապիայի բաժանմունք: Կյանքի ցուցումներով իրականացվել է բրախիթերապիա՝ արյունահոսությունը կանգնեցնելու նպատակով:
Բրախիթերապիան այս դեպքում բուժման միակ հնարավոր մեթոդն է:
Հայաստանում բրախիթերապիան կատարվում է միայն ՀՀ ԱՆ Վ.Ա. Ֆանարջյանի անվան Ուռուցքաբանության Ազգային Կենտրոնում` օնկոգինեկոլոգիական հիվանդությունների և ուղիղ աղու քացկեղի բուժման ժամանակ:
Երեք շաբաթ տևած բուժման արդյունքում դադարել է արյունահոսությունը, տեղի է ունեցել ուռուցքի հետաճ՝ բարելավելով պացիենտի կյանքի որակը և հնարավորություն ստեղծելով շարունակելու բուժումը:
Բուժումն իրականացրել են բաժանմունքի ղեկավար պրոֆեսոր Էվելինա Բախշինյանը, ճառագայթային օնկոգինեկոլոգ Հասմիկ Ավետիսյանը, Անզգայացման և վերակենդանացման բաժանմունքի բժիշկ-անեսթեզիոլոգ-ռեանիմատոլոգ Կարեն Մելքոնյանը, Ախտորոշման ծառայության բժիշկ-ռադիոլոգ Անահիտ Դարբինյանը, բժշկական ֆիզիկոս Քնարիկ Պողոսյանը, ճառագայթային տեխնիկ Մարինե Յաղջյանը:
Բրախիթերապիան՝ կոնտակտային ճառագայթային բուժումը , աշխարհում կիրառվում է թե՛ որպես ինքնուրույն բուժման մեթոդ, թե՛ որպես հեռահար ճառագայթային բուժման և քիմաթերապիայի լրացում: Այն կարող է կիրառվել նաև պալիատիվ նպատակով:
