Ուռուցքաբանության ազգային կենտրոնի մասնագետները ոչ միայն կատարում են եզակի և բարդ վիրահատություններ, այլև մշակում և առաջարկում են արդյունավետ բուժման նորարարական մոտեցումներ։

ՈւԱԿ էր դիմել 67-ամյա տղամարդ, որի մոտ ախտորոշվել էր թոքի առաջնային սինովյալ սարկոմա։ Քաղցկեղի այս տեսակը համարվում է հազվադեպ հանդիպող ուռուցքային պաթոլոգիա՝ կազմելով թոքի ուռուցքների ընդամենը 0.5%-ը։

Բոլոր անհրաժեշտ նախավիրահատական հետազոտություններից հետո պացիենտը ենթարկվել էր վիրահատության Կրծքավանդակային վիրաբուժության և ինտերվենցիոն թոքաբանության բաժանմունքում, ապա ստացել ադյուվանտ ճառագայթային թերապիա` Հեռահար ճառագայթային թերապիայի բաժանմունքում։

Արդեն 3 տարի է՝ պացիենտը գտնվում է հսկողության տակ, և հիվանդության կրկնության որևէ դրսևորում չի արձանագրվել։

 Այս դեպքի եզակիությունն այն էր, որ ստանդարտացված բուժման մոտեցում նման հազվադեպ դեպքերի համար սահմանված չէ։ Հաշվի առնելով հիվանդության ագրեսիվ բնույթը՝ ՈւԱԿ մասնագետները, չնայած կատարված ռադիկալ վիրահատությանը, որոշում կայացրեցին իրականացնել նաև ադյուվանտ ճառագայթային բուժում` ապահովելով առավել արդյունավետ արդյունք։

 Պացիենտի վարման եզակի փորձի հիման վրա պատրաստվել է գիտական հոդված, որը հրապարակվել է միջազգային ազդեցության գործակից ունեցող «Cureus» պարբերականում։

 Հոդվածն ամբողջությամբ կարող եք ընթերցել հետևյալ հղումով:

 Մենք կարևորում ենք ոչ միայն ժամանակակից բուժման մեթոդների ներդրումը մեր կենտրոնում, այլև միջազգային բժշկական հանրության հետ մեր մասնագետների ձեռքբերումներով կիսվելը։