Բուժսպասարկման որակի բարելավմանն ուղղված բուժանձնակազմի շարունակական ուսուցում
Բուժսպասարկման որակի բարելավման նպատակով կենտրոնում իրականացվում է բուժանձնակազմի շարունակական ուսուցում, ակտիվ մասնակցություն առղջապահական համակարգի հասարակական կյանքին:
Հակաբիոտիկների նկատմամբ կայունությունը խնդիր է ինչպես աշխարհի պետությունների առողջապահական համակարգերի, այնպես էլ Հայաստանի Հանրապետության համար: Բժշկական օգնություն և սպասարկում իրականացնող կազմակերպություններում բուժման և հետազոտության ընթացքում պացիենտների մոտ կարող են զարգանալ ներհիվանդանոցային վարակներ, որոնց ցուցանիշների բարձրացումը նպաստում է վարակային բարդությունների բուժման նպատակով հակաբիոտիկների կիրառմանը:
Հակաբիոտիկների ոչ ռացիոնալ կիրառումը երկարացնում է բուժման տևողությունը, բարձրացնում բուժման արժեքը, առաջացնում լրացուցիչ հիվանդացություն, ձևավորվում են մանրէների հակաբիոտիկակայուն շտամներ, որոնք կարող են տարածվել նաև բուժհիմնարկի սահմաններից դուրս, փոխելով նաև ազգաբնակչության շրջանում շրջանառվող մանրէների որակական հատկանիշները:
Հակաբիոտիկակայուն շտամների ձևավորման կանխարգելման նպատակով Առողջապահության Համաշխարհային Կազմակերպության կողմից նոյեմբերի 16-22-ը աշխարհում «Հակաբիոտիկներ. կիրառել պատշաճ» կարգախոսով քարոզարշավ է իրականացվում:
Հակաբիոտիկների իրազեկման շաբաթվա շրջանակներում կենտրոնում կազմակերպվել է սեմինար-դասախոսություն՝ ՀՀ առողջապահության նախարարության «Հիվանդությունների վերահսկման և կանխարգելման ազգային կենտրոն»-ի մասնագետների մասնակցությամբ:
Դասախոսության շրջանակներում քննարկվեցին հակաբիոտիկների ռացիոնալ կիրառման, ներհիվանդանոցային վարակների կանխարգելման և այդ խնդիրներին առնչվող մի շարք այլ հարցեր:
Հակաբիոտիկային դեղորայքը թանկ ռեսուրս է, որն անհրաժեշտ է պահպանել հետագա սերունդների համար: Միայն դրանց ճիշտ օգտագործումը կարող է պահպանել այդ դեղերի կարևորագույն հատկությունները, ինչին կնպաստի բուժանձնակազմի կողմից ո՛չ միայն ճիշտ օգտագործումը, այլև ազգաբնակչության շրջանում դրանց անկանոն օգտագործման կանխումը: Հակաբիոտիկները կարելի է օգտագործել միայն որակավորված բժիշկների նշանակումներին համապատասխան:
Ուռուցքաբանության ազգային կենտրոնն, Առողջապահության Համաշխարհային Կազմակերպության հետ միասին, կոչ է անում առողջապահության համակարգի բոլոր աշխատակիցներին միանալ իրազեկման շաբաթին:
