ՈՒԱԿ-ի Օնկոուրոլոգիական բաժանմունքում երիկամների և շագանակագեղձի բաց վիրահատությունները վաղուց արդեն մնացել են անցյալում՝ իրենց տեղը զիջելով անհամեմատ ավելի մեծ արդյունավետություն ունեցող լապարասկոպիկ վիրահատություններին: 

Շարունակական համագործակցությունների շնորհիվ՝ Ուռուցքաբանության ազգային կենտրոնում վերջերս կատարվել են տարբեր դժվարություններով և առանձնահատկություններով 5 վիրահատություններ:

Վիրահատությունները կատարել են Տյումենի մարզային ուրոլոգիական կենտրոնից հրավիրված փորձառու վիրաբույժ, մեր հայրենակից Հայկ Պետրոսյանն ու ՈւԱԿ Օնկոուրոլոգիական բաժանմունքի անձնակազմը՝ բաժանմունքի ղեկավար Կարեն Ծառուկյանի գլխավորությամբ: 

Համատեղ լապարոսկոպիկ վիրահատությունների համար ընտրվել են 5 ոչ ստանդարտ դեպքեր: Կատարվել են երիկամների բարդ տեղակայումներով ուռուցքների լապարասկոպիկ հեռացումներ, միզածորանի մասնահատում՝ վերականգնողական միջամտությամբ, միզապարկի և շագանակագեղձի արմատական հեռացում: 

Վիրահատությունների ընթացքում հայազգի մասնագետը ներկայացրել է իր փորձն ու գիտելիքները, ինչի շնորհիվ նմանատիպ լապարասկոպիկ վիրահատությունները մեր կենտրոնում կլինեն էլ ավելի հաճախակի:

Երկու կենտրոնների համագործակցությունը տվել է իր սպասված արդյունքները:

Վիրահատություններն անցել են բարեհաջող: 5 բուժառուներից 4-ը արդեն իսկ դուրս են գրվել ՈՒԱԿ-ից: