Հոկտեմբերի 18–19-ին առցանց ձևաչափով կայացավ Բժիշկ Րաֆֆի Հովհաննիսյանի անվան 4-րդ միջազգային բժշկական գիտաժողովը, որը նվիրված էր կոլոռեկտալ քաղցկեղի կանխարգելման, ախտորոշման և բուժման արդի մոտեցումներին։
Գիտաժողովը կազմակերպվել էր Մասնագիտական Զարգացման Միջազգային Կենտրոնի (ICPD) կողմից՝ համախմբելով Հայաստանի, ԱՄՆ-ի, Կանադայի, Իսպանիայի, Արգենտինայի, Ռուսաստանի և այլ երկրների առաջատար մասնագետներին, որոնց հետ վերջին տարիներին իրականացվել են մի շարք համատեղ մասնագիտական միջամտություններ։ 

Միջոցառման համանախագահում էր Ուռուցքաբանության ազգային կենտրոնի ընդհանուր և էնդովիրաբուժության բաժանմունքի վիրաբույժ Ավետիք Պետրոսյանը։ Նա հանդես եկավ զեկույցով՝ ներկայացնելով կոլոռեկտալ վիրաբուժության ժամանակակից մոտեցումները և նորարարական լուծումները։

ՈւԱԿ-ի մասնագետները գիտաժողովին ակտիվ մասնակցություն ունեցան՝ հանդես գալով մի շարք հետաքրքիր զեկույցներով։
Հեռահար ճառագայթային թերապիայի բաժանմունքի վարիչ Թաթուլ Սաղաթելյանը խոսեց ուղիղ աղիքի քաղցկեղի ճառագայթային բուժման արդի մոտեցումների մասին,
Դեղորայքային ուռուցքաբանության բաժանմունքի բժիշկ-քիմիաթերապևտ Կարինե Սողոմոնյանը ներկայացրեց դեղորայքային թերապիայի նորարարական ուղությունները,
Ընդհանուր և էնդովիրաբուժության բաժանմունքի բժիշկ-էնդոսկոպիստ Վլադիմիր Նահապետյանը կիսվեց աղիքային խցանումներով բարդացած դեպքերի բուժման և ստենտերի կիրառման փորձով։

Գիտաժողովի ընթացքում մասնագետները քննարկեցին ոլորտի վերջին գիտական և տեխնոլոգիական զարգացումները, նոր մոտեցումները վաղ հայտնաբերման և բուժման գործընթացներում, ինչպես նաև կարևորեցին բազմամասնագիտական համագործակցության շարունակականությունը։

Միջոցառումը ներառված էր շարունակական բժշկական կրթության (ՇՄԶ) ծրագրում, և մասնակից բժիշկները ստացան կրեդիտային միավորներ։

Ուռուցքաբանության ազգային կենտրոնի մասնագետների ներգրավվածությունը ևս մեկ անգամ փաստեց կենտրոնի ակտիվ մասնակցությունը միջազգային բժշկական կրթական գործընթացներին և հաստատեց, որ հայ բժիշկների մասնագիտական ներուժը համապատասխանում է միջազգային չափանիշներին։