ՀՀ ԱՆ Վ․Ա․ Ֆանարջյանի անվան Ուռուցքաբանության ազգային կենտրոնի Ընդհանուր և մանկական քիմիաթերապիայի Բացօթյա սրահում, «Ռոշ» դեղագործական ընկերության հետ համատեղ,  անցկացվեց առաջին գիտաժողովը, որը նվիրված էր կրծքագեղձի HER2 դրական քաղցկեղի բուժման արդի մոտեցումներին։

Զեկույցներով հանդես եկան բաժանմունքի վարիչ, բ․գ․թ․ Նաիրա Ջանոյանը, քիմիաթերապևտներ, բ․գ․թ․ Աննա Թադևոսյանը և Արաքսյա Հովհաննիսյանը։

Անդրադարձ կատարվեց HER2 դրական քաղցկեղով հիվանդների բուժման նորամուծություններին, մասնավորապես, ներկայացվեցին հիվանդների բուժման արդյունավետության ցուցանիշների բարելավումը թիրախային դեղորայքների կիրառումով, որոնք են տրաստուզումաբը, պերտուզումաբը և կադսիլան։

Քննարկվեց հակա-HER թերապիայի կիրառումը կրծքագեղձի HER2 դրական քաղցկեղով հիվանդների բուժման գործում, ինչպես ադյուվանտ և նեո-ադյուվանտ ռեժիմում, այնպես էլ մետասթատիկ դեպքերի ժամանակ։

Ներկայացվեցին մի շարք միջազգային կլինիկական հետազոտությունների արդյունքներ, որոնց վերլուծությունը վկայել է հակա-HER թերապիայի բարձր արդյունավետության մասին։

Գիտաժողովին մասնակցեցին  քիմիաթերապևտներ այլ բժշկական կենտրոններից, ինչպես նաև «Ռոշ» ընկերության ներկայացուցիչները։